Goradil qəsəbəsindəki “Rabitəçi” sağlamlıq düşərgəsində yerləşən Şuşa rayon 9 saylı orta məktəbdə “Bilik günü” keçirilib. Hər zaman olduğu kimi, Rabitə və Yüksək Texnologiyalar Nazirliyinin dəstəyi ilə “Bilik günü” üçün öncədən hazırlıq görən “Teleradio” İB, 15 sentyabr günü şagirdləri yeni görkəmli sinif otaqları ilə sevindirmişdir. Yeni tədris ilinin başlanması münasibətilə Rabitə və yüksək texnologiyalar nazirinin müavini E. Vəlizadə, “Teleradio” İB-nin baş direktoru Ə. Şərifov, Rabitə və YüksəkTexnologiyalar Nazirliyinin struktur və tabe qurumlarının nümayəndələri, həmçinin, Təhsil Nazirliyinin və Şuşa rayon İcra Hakimiyyətinin nümayəndələri orta məktəbdə keçirilən “Bilik günü” tədbirinə qatılıblar. Giriş nitqi ilə tədbiri açıq elan edən məktəbin direktoru Q. Abdullayev, məktəbə birbaşa qayğı göstərən Rabitə və yüksək texnologiyalar naziri cənab Ə. Abbasov başda olmaqla, bütün digər əlaqədar qurum və onların rəhbərlərinə təşəkkürünü bildirib. Bu mənada, o, “Teleradio” İB-nin əməyini xüsusi vurğulayıb və baş direktor Ə. Şərifova şəxsən minnətdarlıq edib. Daha sonra, söz, Rabitə və yüksək texnologiyalar nazirinin müavini E. Vəlizadəyə verilib. O da, şagirdlərə arzularını bildirib və yeni tədris ilinin açılışı münasibətilə, bütün şagirdləri təbrik edib. Bundan sonra, şagirdlərə hədiyyələr təqdim edilib. Sonda isə tədbir iştirakçıları məktəbin sinif otaqlarına nəzər salıb və şagirdlərlə qısa dialoq təşkil ediblər.